كۆمه‌ڵه‌و رێكخراوه‌ كوردییه‌كانی‌ لوبنان له‌جموجۆڵێكی‌ چڕ‌و پڕدان بۆ ئه‌وه‌ی‌ له‌خولی‌ داهاتووی‌ په‌رله‌مانی‌ لوبناندا نوێنه‌رێكیان هه‌بێت.سه‌ره‌تای‌ ئه‌م هه‌فته‌یه‌ بۆ ئه‌و مه‌به‌سته‌ وه‌فدێك له‌خێزانه‌ كورده‌كانی‌ لوبنان سه‌ردانی‌ قرێتیمیان كردو له‌لایه‌ن سه‌عد حه‌ریری‌ سه‌رۆكی‌ كوتله‌ی‌ مسته‌قبه‌لی‌ لوبنانه‌وه‌ پێشوازیان لێكرا.

وه‌فده‌كه‌ داوایان له‌حه‌ریری‌ كرد كه‌ بایه‌خێكی‌ زیاتر‌و پێویست به‌هاوڵاتیانی‌ كورد له‌لوبنان بدات، هه‌روها رێزو پێزانینی‌ خۆشیان به‌رامبه‌ر به‌و ده‌سكه‌وتانه‌ ده‌ربڕی‌ كه‌ له‌سایه‌ی‌ حكومه‌تی‌ ره‌فیق حه‌ریریدا له‌لوبناندا بۆ كورد به‌دیهاتن.
به‌پێی‌ ئاژانسه‌كانی‌ هه‌واڵی‌ سه‌ر به‌كوتله‌ی‌ مسته‌قبه‌ل‌و 14ی‌ ئازار، حه‌ریری‌ له‌م كۆبونه‌وه‌یه‌دا كه‌ له‌ماڵی‌ ره‌فیق حه‌ریری‌ به‌ڕێوه‌چووه‌ به‌وه‌فده‌كه‌ی‌ وتووه‌ «ئێوه‌ له‌ڕیزی‌ پێشه‌وه‌ی‌ ئه‌مه‌كدارانی‌ ئه‌م ماڵه‌دا بون، له‌ساته‌وه‌ختی‌ شه‌هیدكردنی‌ سه‌رۆك حه‌ریریدا‌و سه‌ربڵندانه‌ له‌ته‌ك ئێمه‌دا وه‌ستان‌و له‌14ی‌ ئازاری‌ 2005یشدا له‌ڕیزی‌ هه‌ره‌ پێشه‌وه‌ی‌ ئه‌وانه‌دا بون كه‌ داوای‌ چونه‌ده‌ره‌وه‌ی‌ سوپای‌ سوریاتان له‌لوبنان كرد».
به‌پێی‌ هه‌واڵی‌ ئاوێنه‌ ،هه‌روه‌ها حه‌ریری‌ ئاماژه‌ی‌ به‌وه‌ كردووه‌ كه‌ «به‌شێك له‌داواكارییه‌ مێژووییه‌كانی‌ ئێوه‌ له‌لایه‌ن ره‌فیق حه‌ریرییه‌وه‌ به‌دیهات، بێ‌ ئه‌وه‌ی‌ باكی‌ به‌و پڕوپاگه‌نده‌‌و درۆ‌و ده‌له‌سانه‌ هه‌بێت كه‌ له‌دژی‌ ساز كران، ئێوه‌ له‌م وڵاته‌دا له‌دایكبون‌و رۆڵتان له‌ئاوه‌دانكردنه‌وه‌یدا بینیوه‌‌و به‌شێكی‌ لێكجیانه‌بۆوه‌ن لێی‌».
له‌هه‌مانكاتیشدا حه‌ریری‌ به‌ڵێنی‌ ئه‌وه‌ی‌ پێداون كه‌ «ده‌ست له‌خواسته‌كانی‌ ئێوه‌ هه‌ڵناگرین‌و كار بۆ به‌دیهێنانیان ده‌كه‌ین».
چه‌ند رۆژێك له‌مه‌وبه‌ریش وه‌فدێكی‌ كۆمه‌ڵه‌ی‌ خێرخوازی‌ كورد به‌سه‌ركردایه‌تی‌ به‌هائه‌دین حه‌سه‌ن، چاویان كه‌وت به‌محه‌مه‌د نه‌عیم قاسمی‌ جێگری‌ حه‌سه‌ن نه‌سروڵای‌ ئه‌مینداری‌ گشتی‌ حیزبوڵای‌ لوبنان‌و به‌هه‌مانشێوه‌ خوازیاری‌ ئه‌وه‌ بون كه‌ حیزبوڵا پشتیوانی‌ ئه‌وه‌یان لێ بكات كه‌ كورد وه‌كو كه‌مینه‌یه‌كی‌ نه‌ته‌وه‌یی‌ حسابی‌ بۆ بكرێت نه‌ك وه‌ك په‌یڕه‌وانی‌ سوننه‌‌و له‌مافی‌ نوێنه‌رایه‌تی‌ خۆیان له‌په‌رله‌مانی‌ ئه‌و وڵاته‌دا بێ به‌ش نه‌بن.
ئه‌م جموجۆڵه‌ی‌ كورد له‌كاتێ كدایه‌ كه‌ هه‌ردوو لایه‌نی‌ هه‌واداری‌ حكومه‌ت‌و ئۆپۆزسیۆنی‌ ئه‌و وڵاته‌ له‌خۆئاماده‌كردن‌و ململانێیه‌كی‌ توندان به‌مه‌به‌ستی‌ بردنه‌وه‌ی‌ زۆرینه‌ی‌ كورسییه‌كانی‌ په‌رله‌مان، كه‌ به‌لای‌ هه‌ردوولایانه‌وه‌ مه‌سه‌له‌یه‌كی‌ گرنگ‌و چاره‌نوسسازه‌.
چاودێران پێیانوایه‌ كه‌ ده‌نگده‌رانی‌ كورد له‌به‌یروتی‌ پایته‌ختی‌ لوبناندا ده‌توانن رۆڵێكی‌ كاراو به‌رچاو ببینن له‌هه‌ڵبژاردنه‌كه‌دا، بۆیه‌ له‌لایه‌ن هه‌ردوو هێزه‌ ركه‌به‌ره‌كه‌ی‌ 14ی‌ ئازار‌و 7ی‌ ئازاره‌وه‌ له‌م كاته‌دا پێشوازیان لێده‌كرێ‌‌و گرنگیان پێده‌درێت.
كورده‌كانی‌ لوبنان ژماره‌یان له‌نێوان 50 تا 75 هه‌زار كه‌سدایه‌و جگه‌ له‌وه‌ی‌ كه‌ خاوه‌نی‌ چه‌ندین كۆڕ‌و كۆمه‌ڵه‌ی‌ كۆمه‌ڵایه‌تین، دوو حیزبی‌ سه‌ره‌كیشیان هه‌یه‌ به‌ناوی‌ ئه‌لپارتی‌‌و حیزبی‌ رزگاری‌. هه‌روه‌ها به‌ده‌یان هه‌زار كوردی‌ سوریاش له‌لوبناندا خه‌ریكی‌ كرێكارین‌و رێكخستنه‌كانی‌ په‌كه‌كه‌ش له‌ناویاندا به‌هێزه‌.