ژماره‌یه‌ک ئه‌فسه‌ری پله‌به‌رزی خانه‌نشیکراوی سوپا و باڵێوزه خانه‌نشیکراوه‌‌كانی‌ توركیا راپۆرتێكیان به‌ناونیشانی‌ «کێشه‌ی کورد»ه‌وه‌ ئاماده‌کردووه‌ و پێشکه‌شی ئه‌ندامانی ئه‌نجومه‌نی ئاسایشی نه‌ته‌وه‌ی تورکیا و به‌رپرسانی باڵای ئه‌و وڵاته‌یان كردووه‌و تیایدا داوای ناساندن و دان پێدانانی‌ ناسنامه‌ی که‌لتوری نه‌ته‌وه‌ی کورد ده‌كه‌ن.

به پێ هه واڵی چاودێر ،سه‌نته‌ری لێکۆڵینه‌وه‌ ستراتیژیه‌کانی بیلگێ و گروپی لێکۆڵینه‌وه‌کانی سیاسه‌تی ده‌ره‌وه‌ و به‌رگری راپۆرتێکیان له‌ژێر ناونیشانی «کێشه‌ی کورد» ئاماده‌کردووه‌ و تیایدا بۆچوونی خۆیان بڵاوکردۆته‌وه‌ و چه‌ند پێشنیارێکیان سه‌باره‌ت به‌ سیاسه‌تی په‌یوه‌ندیدار به‌ دۆزی کورده‌وه‌ خستۆته‌روو و پێشکه‌شی ئه‌نجومه‌نی ئاسایشی نه‌ته‌وه‌ی تورکیا کراوه‌ که‌ سبه‌ینێ کۆده‌بێته‌وه‌.
له‌و راپۆرته‌دا داواکراوه‌ که‌ دان به‌ ناسنامه‌ی که‌لتوری نه‌ته‌وه‌ی کورددا بنرێت و پێویسته‌ کێشه‌ی کورد له‌ ناوخۆی تورکیاوه‌ چاره‌سه‌ر بکرێت، هه‌روه‌ها داواشکراوه‌ که‌ به‌شیَوه‌یه‌کی لێبوردانه‌ تر مامه‌ڵه‌ له‌گه‌ڵ پارته‌ سیاسیه‌ ئتنیه‌کاندا بکرێت.
راپۆرته‌که‌ ئاماژه‌ به‌وه‌شداوه‌ که‌ « ده‌وڵه‌تێکی یه‌کگرتوو په‌یوه‌سته‌ به‌ ناساندنی پێناسی که‌لتوری کوردیه‌وه‌» .
ئاماده‌كارانی‌ راپۆرته‌كه‌ جه‌ختیان له‌وه‌ كردته‌وه‌ که‌ «په‌خشکردن به‌ زمانی کوردی له‌ که‌ناڵه‌ تایبه‌ته‌کاندا و دانانی زمانی کوردی وه‌ک وانه‌یه‌کی هه‌ڵبژارده‌ بۆ فێربوون و کردنه‌وه‌ی به‌شی کوردی له‌ هه‌ندێ له‌ زانکۆکاندا کارێکی باشه‌ و سوودی هه‌یه‌».
سه‌باره‌ت به‌ به‌ره‌نگاربوونه‌وه‌ش له‌گه‌ڵ په‌که‌که‌دا راپۆرته‌که‌ رایده‌گه‌یه‌نێت که‌ پێویسته‌ بیرۆکراسیه‌تی ئه‌منی دووباره‌ بنیات بنرێته‌وه‌.