بڵاوكردنه‌وه‌ی كتێبێك سه‌باره‌ت به‌مێژووی‌ پاتریاركه‌كانی‌ ئاشوری‌و كوشتنی‌ مار شه‌معون له‌لایه‌ن سمایل خانی‌ شكاك «سمكۆ»وه‌، هه‌رایه‌ك ده‌نێته‌وه‌، كتێبه‌كه‌ به‌زمانی‌ عه‌ره‌بی‌ له‌چاپخانه‌ی‌ «خانی»‌ دهۆك چاپكراوه‌و تیایدا كورد به‌«دڕنده‌و وه‌حشی‌»و« سمكۆ» یه‌كێك له‌سه‌ركرده‌كانیشی‌ به‌«سه‌گی‌ هار» ناوده‌بات.ناونیشانی‌ كتێبه‌كه‌ «تاریخ البیت الا‌بوی» یه‌و ساڵی‌ 1927مه‌تران «ایلیا أبونا» به‌سریانی‌ نوسیویه‌تی‌، كه‌ سه‌ر به‌بنه‌ماڵه‌یه‌كی‌ مه‌سیحی‌ شاری‌ ئه‌لقوشه‌. «بنیامین حه‌داد»یش وه‌ریگێڕاوه‌ته‌ سه‌ر زمانی‌ عه‌ره‌بی‌.

«مار شه‌معونی»‌ پاتریاركی‌ ئاشورییه‌كان له‌كۆتایی‌ جه‌نگی‌ یه‌كه‌می‌ جیهانیدا ده‌یویست له‌گه‌ڵ سمكۆی‌ شكاك رێبككه‌وێ‌ به‌مه‌به‌ستی‌ روبه‌ڕوبونه‌وه‌ی‌ توركه‌كان، له‌كاتێكدا كه‌ سمكۆ له‌3/3/1918دا داوه‌تی‌ ده‌كات بۆ كۆنه‌شار، له‌پشته‌وه‌ ته‌قه‌ی‌ لێده‌كاو ده‌یكوژێت.
له‌چه‌ند بڕگه‌یه‌كی‌ ئه‌م كتێبه‌دا به‌خراپ ناوی‌ كورد ده‌برێت و له‌به‌رامبه‌ریشدا كتێبه‌كه‌ ستایشی‌ عه‌ره‌ب ده‌كات، چه‌ند جارێكیش سمكۆی‌ شكاك به‌سه‌گی‌ هار «الكلب المسعور» ناو ده‌بات.
له‌لاپه‌ڕه‌ 159دا هاتووه‌ كه‌ «كوردو ئێرانیه‌كان رێككه‌وتن به‌سه‌رۆكایه‌تی‌ سمكۆو هۆزی‌ شكاك میلله‌تی‌ ئاشور له‌ناوبه‌رن‌و مار شه‌معون بكوژن، كه‌س بیری‌ بۆ ئه‌وه‌ نه‌ده‌چوو كه‌ ئه‌م سه‌گه‌ هاڕه‌ به‌م كاره‌ ناشرینه‌ رابێت».
هه‌روه‌ها له‌لاپه‌ره‌ 160دا هاتووه‌ كه‌ «له‌كاتی‌ میوانداری‌ مار شه‌معون له‌ماڵی‌ سمكۆ، دوا ساته‌كانی‌ ژیانی‌ بوو به‌ڵام خۆی‌ نه‌یده‌زانی‌ كۆتاییه‌تی‌و له‌سه‌ر ئه‌و خاكه‌ چڵكنه‌ خوێنی‌ ده‌ڕژێ‌و ئه‌و خاكه‌ پیس‌و چه‌په‌ڵه‌ی‌ به‌خوێنی‌ خۆی‌ پیرۆز ده‌كات».
‌ئاوێنه‌‌ راگه‌یاند: ئه‌م كتێبه‌ له‌كوردستان‌و شاری‌ دهۆك و چاپخانه‌ی‌ خانی‌ چاپكراوه‌ كه‌ « سه‌ركیس ئاغاجان» خاوه‌ن ئیمتیازیه‌تی‌و به‌سه‌رپه‌رشتی‌ وه‌زاره‌تی‌ رۆشنبیری‌و حكومه‌تی‌ هه‌رێم چاپ كراوه‌‌و بووه‌ته‌ مایه‌ی‌ ناڕه‌زایی‌ به‌شێك له‌ڕۆشنبیران‌و نوسه‌ران.
وه‌رگێڕی‌ ئه‌م كتێبه‌، بنیامین حه‌داد له‌په‌یوه‌ندییه‌كدا به‌ئاوێنه‌ی‌ راگه‌یاند كه‌ «من ئه‌و بڕگانه‌م لابرد به‌خراپی‌ باسی‌ كورد ده‌كه‌ن، به‌ڵام له‌چاپخانه‌ی‌ خانی‌ نوسخه‌ی‌ ئه‌سلیان بڵاوكردۆته‌وه‌».
سه‌باره‌ت به‌م كتێبه‌كه‌ش ناوبراو وتی‌ «نوسه‌ر وه‌كو یاداشت نوسیه‌تی‌ كه‌ دوره‌ له‌ڕێگه‌ی‌ زانستی‌و عاتیفه‌ی‌ به‌كارهێناوه‌و تیایدا سوكایه‌تی‌ به‌بزوتنه‌وه‌ی‌ كورد كردوه‌، هه‌وڵده‌ده‌ین له‌چاپی‌ داهاتودا ئه‌و به‌شانه‌ لاببه‌ین».
ئه‌مه‌ له‌كاتێكدایه‌ كه‌ جگه‌ له‌م كتێبه‌، چه‌ند كتێبێكی‌ دیكه‌ش به‌هه‌مانشێوه‌ له‌چاپخانه‌ی‌ خانی‌ چاپكراون كه‌ تیایدا سوكایه‌تی‌ به‌سمكۆی‌ شكاك‌و كورد كراوه‌ وه‌ك «تاریخ كنیسه‌ مار متی‌» و «تاریخ المزابح الا‌شوریة‌».
ئه‌مه‌ یه‌كێكه‌ له‌و كارانه‌ی‌ كه‌ زۆرێك له‌مێژنووسان و لێكۆڵه‌ران وه‌ك خاڵێكی‌ ره‌شی‌ كارنامـــــه‌ی‌ سه‌ركرده‌كانی‌ كورد ئاماژه‌ی‌ پێده‌كه‌ن، ته‌نانه‌ت به‌شێكی‌ گــــه‌وره‌ی‌ رۆشنبیرو سیاسه‌تمه‌دارانی‌ كوردیش له‌سه‌ر ئیدانه‌ی‌ كردنی‌ ئه‌م كاره‌و به‌چه‌وت له‌قه‌ڵه‌مدانی‌ كۆكن‌و هــــه‌ندێكیشیان ئه‌م ره‌فتاره‌یان به‌كارێكی‌ ناجوامێرانه‌ ناوبردووه‌.