سایتی‌ چاودێر: ئه‌سعه‌د ئه‌رده‌ڵان سه‌رۆكی‌ كۆمه‌له‌ی‌ كوردانی‌ دانیشتوی‌ تاران ته‌ئكیدی‌ كرده‌وه‌ كورد مه‌رجی هه‌یه‌ بۆ ئه‌و كه‌سانه‌ی‌ ده‌نگی‌ ده‌داتێ و هه‌ر كه‌سێك به‌ڵێن بدات مه‌رجه‌كانمان جێبه‌جێ بكات ئێمه‌ ده‌نگی‌ خۆمانی‌ ده‌ده‌ینێ.

ئه‌رده‌ڵان بۆ ئاكانیوز وتی‌ : پێویسته‌ بودجه‌ی‌ زیاتر بۆ شاره‌ كوردیه‌كان ته‌رخان بكرێت و پۆستی‌ پایه‌بڵندیش بدرێت به‌ كورد ئه‌گه‌رنا ده‌نگ ناده‌ین به‌ پاڵێوراوانی‌ سه‌رۆكایه‌تی‌ كۆماری‌ ئێران .
وتیشی‌ مافی‌ كورد نه‌دراوه‌ و پێویسته‌ له‌ گشت بواره‌كانی‌ سیاسی و ئابوری‌ و كۆمه‌ڵایه‌تی‌ و ته‌نانه‌ت له‌ روی‌ كه‌لتوریشه‌وه‌ مافه‌كانی‌ كورد دابین بكرێت وه‌ك خوێندن و نوسین به‌ زمانی‌ كوردی‌ و پێدانی‌ پۆستی‌ شاره‌ كوردیه‌كان به‌ خودی‌ كورد چونكه‌ چوار پارێزگای‌ كورد هه‌یه‌.
ئه‌سعه‌د ئه‌رده‌ڵان ئه‌وه‌شی‌ راگه‌یاند پێویسته‌ كۆمه‌له‌كه‌ له‌گه‌ڵ كاندیده‌كانی‌ سه‌رۆكایه‌تی‌ ئێران كۆببینه‌وه‌ و باس له‌ مه‌رجی‌ خۆمان بكه‌ین بۆ ئه‌وه‌ی‌ له‌ حكومه‌تی‌ داهاتوودا وه‌زیری‌ كورد و به‌رپرسی باڵای‌ كورد هه‌بن .
دوپاتیشی‌ كرده‌وه‌ له‌ هه‌لبژاردنی‌ پێشوو به‌ڵێنی‌ زۆر به‌ كوردان درا به‌ڵام هیچكام له‌و مه‌رجانه‌ به‌دی نه‌هات به‌ڵام ئه‌وه‌شی‌ نه‌شارده‌وه‌ كه‌ ره‌وشی‌ كوردان له‌ ئێران زۆر باشتره‌ له ‌ 15 ساڵ له‌مه‌وبه‌ر له‌گه‌ڵ ئه‌وه‌ش دا پێویسته‌ ریفۆرم له‌ ده‌ستوردا بكرێت و زمانی‌ كوردیش بكرێته‌ زمانی‌ ره‌سمی‌ له‌ ئێران.