ره‌جه‌ب ته‌یب ئه‌ردۆگانی‌ سه‌رۆك وه‌زیرانی توركیا، له‌ وتارێكیدا له‌ شاری وان، رایگه‌یاند ئه‌گه‌ر په‌كه‌كه‌ ئاشتی ده‌وێت با چه‌ك دابنێت.

سیه ی به‌ پێی هه‌واڵێكی ئاژانسی ئه‌نادۆڵی توركیا رایگه یاند، ره‌جه‌ب ته‌یب ئه‌ردۆگان به‌ ئاماژه‌كردن به‌وه‌ی كه‌ حكومه‌ته‌كه‌ی هه‌وڵ ده‌دات بۆ گه‌یشتن به‌ ئاستی شارستانیه‌تی هاوچه‌رخ ‌و یه‌كڕیزی‌ خه‌ڵكی‌ توركیا وتی: "پشت به‌خوا به‌ هه‌مو ئامانجێك ده‌گه‌ین و هه‌مو بیرۆكه‌كانمان ده‌مانگه‌یه‌نێته‌ واقیع".
ئه‌ردۆگان له‌و وتاره‌یدا رایگه‌یاند: "ئه‌گه‌ر په‌كه‌كه‌ ئاشتی ده‌وێت، با چه‌ك دابنێت. ئێمه‌ وه‌ك حیزبی داد و گه‌شه‌پێدانی‌ ده‌سه‌ڵاتدار دژی گروپه‌ چه‌كداره‌كانین و له‌و بڕوایه‌داین كوشتنی یه‌ك مرۆڤـ كوشتی هه‌مو مرۆڤه‌كانه‌".
سه‌رۆك وه‌زیرانی‌ توركیا وتیشی: ئه‌وانه‌ی ده‌یانه‌وێت به‌هێزی‌ چه‌ك رێگه‌ له‌ خواستی‌ خه‌ڵك بگرن، ناتوانن باسی دیموكراسی بكه‌ن، چونكه‌ قسه‌كردن له‌ سه‌ر دیموكراسی په‌یوه‌سته‌ به‌ بنه‌مای رێزگرتن له‌ ئیراده‌ی‌ مرۆڤایه‌تی و ئیراده‌ی نه‌ته‌وه‌ییه‌وه‌.
پێشتریش رۆژنامه‌ی‌ زه‌مانی‌ توركی‌ له‌سه‌ر زاری‌ باشبوك سه‌رۆك ئه‌ركانی‌ سوپای‌ توركیا رایگه‌یاندبو‌ كه‌ حكومه‌تی‌ توركیا به‌ رێگای‌ دیموكراتیانه‌ چاره‌سه‌ری‌ كێشه‌ی‌ كورد ده‌كات.
له‌لایه‌كی‌ تره‌وه‌ عوسمان ئۆجه‌لان كه‌سایه‌تی سیاسی كوردستانی باكور رایگه‌یاند بو:‌ پێویسته‌ په‌كه‌كه‌ چه‌ك دانێت و كۆتایی به‌ چالاكی چه‌كداری بهێنێت.
عوسمان ئۆجه‌لانی برای عه‌بدوڵڵا ئۆجه‌لان و ئه‌ندامی‌ كۆنسه‌ی‌ سه‌رۆكایه‌تی‌ پێشوی‌ په‌كه‌كه‌، له‌ چاوپێكه‌وتنێكدا له‌گه‌ڵ‌ رۆژنامه‌یه‌كی به‌شه‌ یۆنانیه‌كه‌ی قوبرس وتیشی‌: شه‌ڕی چه‌كداری په‌كه‌كه‌ له‌ به‌رژه‌وه‌ندی كورد ته‌واو نابێت.
عوسمان كه‌ ئێستا له‌ هه‌رێمی كوردستان ده‌ژی ئه‌وه‌شی‌ وتوه‌: له‌گه‌ڵ‌ ئه‌و تێڕوانینه‌ی جه‌لال تاڵه‌بانی سه‌رۆك كۆماری‌ عێراقدایه‌ كه‌ سه‌رده‌می شه‌ڕی چه‌كداری كۆتایی هاتوه‌.